තවදුරටත් මහින්ද රාජපක්ෂ හිටපු ජනාධිපතිවරයා කෙරෙහි විශ්වාසයක් පවතින අතර ශ්‍රී ලංකා පොදුජන පෙරමුණෙන් මේ වන විට ඈත්ව සිටින අයද යළි එක්කර ගැනීමේ අවශ්‍යතාවක් පවතින බව විදේශ කටයුතු රාජ්‍ය අමාත්‍ය තාරක බාලසූරිය මහතා පැවසුවේය.
ඒ, අද (25) ශ්‍රී ලංකා පොදුජන පෙරමුණේ ප්‍රධාන කාර්යාලයේදී පැවති මාධ්‍ය හමුවේදීය.
ඉදිරියේදී පුළුල් සන්ධානයක් ඇති කළ යුතු බවත් මෙහිදී ජනාධිපතිවරයාගේ පාර්ශවය පවා එක්කර ගත යුතු වන බවයි හෙතෙම අවධාරණය කළේ.
ASK
ඉදිරියේදී කවුරුන් ආණ්ඩු පිහිටුවූවත් තමන් සහ නිමල් සිරිපාල ද සිල්වා මහතා ඒ ආණ්ඩුවල ඇමතිකම් දරණ බව ප්‍රාථමික කර්මාන්ත රාජ්‍ය අමාත්‍ය චාමර සම්පත් දසනායක මහතා පවසයි.
එසේම කවුරුන් ආණ්ඩු හැදීමට දැඟළුවත් ඒ කිසිවෙකුට පාර්ලිමේන්තුවේ ආසන 113ක බහුතර බලයක් ලබාගැනීමට නොහැකි යැයි 100%ක් විශ්වාස බවත් ඒ මහතා සඳහන් කළේය.
එමෙන්ම ශ්‍රී ලංකා නිදහස් පක්ෂයේ හොඳම අශ්වයින් සිටින්නේ තමන් නියෝජනය කරන පිලේ බව පැවසූ ඒ මහතා අනෙක් පිලේ සිටින්නේ දෙතුන් දෙනෙක් පමණක් බවත් පැවසීය.
රාජ්‍ය අමාත්‍ය චාමර සම්පත් දසනායක මහතා මේ බව පැවසුවේ බදුල්ලේ පැවති ජන හමුවකදී ය.
RN
ඉදිරි මාස කිහිපය තුළ මැතිවරණ කිසිවක් නොපැවැත්වෙන අතර ජාතිය ස්ථාවර කිරීමේ ප්‍රතිපත්ති රාමුවක් සකස් කිරීමෙන් අනතුරුව මැතිවරණ මාලාවක් පවත්වන බව එක්සත් ජාතික පක්ෂ පාර්ලිමේන්තු මන්ත්‍රී වජිර අබේවර්ධන මහතා පවසයි.
පවතින තත්ත්වය අනුව මැතිවරණ පැවැත්විය නොහැකි බවත් මැතිවරණ ඉල්ලා සිටින්නේ රට අස්ථාවර කිරීමට බලාපොරොත්තු වන අය බවත් මන්ත්‍රීවරයා සඳහන් කරයි.
මේ අතර පළාත් පාලන ආයතනවල සභික සංඛ්‍යාව 8000 සිට 4000 දක්වා අඩු කිරීම අත්‍යවශ්‍ය බවද ඔහු කියා සිටියි.
මනාප ජන්ද ක්‍රමයද අහෝසි කළ යුතුව ඇති අතර සංවේදී පුද්ගලයන් එයට විරුද්ධ නොවනු ඇතැයිද හෙතෙම පවසයි.
කෙසේවෙතත් විපක්ෂය දිගින් දිගටම අවධාරණය කරමින් සිටින්නේ වත්මන් ජනාධිපතිවරයාට ජන මතයක් නොමැති හෙයින් පවතින්නේ විකෘති තත්ත්වයක් වන නිසා එය නිවැරදි මාවතට ගැනීම සඳහා මැතිවරණ පැවැත්විය යුතු වන බවයි.
එහෙයින් පැවැත්වීමට නියමිත පළාත් පාලන මැතිවරණය හෝ පැවැත්වීමට ආණ්ඩුව ක්‍රියා කළ යුතුව ඇති බවත් ආණ්ඩුවේ මැතිවරණ කල් දැමීමට එරෙහිව විපක්ෂය එක්ව කටයුතු කිරීමටත් තීරණය කර තිබේ.
ASK
මේ වන විට විවිධ මත ඉදිරිපත්කරමින් මැතිවරණ කල්දැමීමට ආණ්ඩුව කටයුතු කරමින් සිටින බවට විපක්ෂය පසුගිය දිනවල අඛණ්ඩව චෝදනා එල්ල කරනු ලැබීය.
දැනට පවතින්නේ විකෘති ජන මතයක් වන හෙයින් පැවැත්වීමට නියමිත පළාත් පාලන මැතිවරණය පවත්වා ජන මතය පිරික්සා බැලිය යුතු වන බවයි විපක්ෂය අවධාරණය කරන්නේ.
ආණ්ඩුවේම නියෝජිතයින් ලෙස කටයුතු කළ ශ්‍රී ලංකා පොදුජන පෙරමුණේ සභාපති මහාචාර්ය ජී.එල්.පීරිස්, ඩලස් අලහප්පෙරුම යන මන්ත්‍රීවරුන්ගෙන් සමන්විත නිදහස ජනතා සභාව විසින් ඊයේ (12) දින විපක්ෂයේ පක්ෂ නියෝජිතයින්ගේ සහභාගීත්වයෙන් මෙම මැතිවරණ කල්දැමීමට එරෙහිව විශේෂ සාකච්ජාවක් කොළඹදී පවත්වන ලදී.
ඒ අනුව ඊට විපක්ෂය නියෝජනය කරන පක්ෂ නියෝජිතයින් සහභාගී වී සිටි අතර මැතිවරණ කල් දැමීමේ ආණ්ඩුවේ උත්සහ පළමු මොහොතේදීම පරාජය කළ යුතු බවට එහිදී එකඟතාවකට පැමිණ තිබේ.
එම සාකච්ජාවෙන් අනතුරුව එම එකඟතාව පිළිබඳ විපක්ෂයේ නියෝජිතයින් මාධ්‍යයට අදහස් දැක්වීමක්ද සිදුකරන ලදී.
ASK
ඊයේ (10) පැවති ශ්‍රී ලංකා නිදහස් පක්ෂයේ ආසන සංවිධායකවරුන්ගේ සහ දිස්ත්‍රික් සංවිධායකවරුන්ගේ රැස්වීමට එම පක්ෂයේ ජාතික සංවිධායක දුමින්ද දිසානායක මහතාව සම්බන්ධ කරගෙන නොමැති බව වාර්තා වේ.
එම රැස්වීම සඳහා දුමින්ද දිසානායක මහතාට ආරාධනයක් හෝ කර නොමැති බව සඳහන්.
දුමින්ද දිසානායක මහතා ළඟදීම ආණ්ඩුවට එක්ව කැබිනට් අමාත්‍ය ධුරයක් ලබාගැනීමට නියමිත බවත් පසුගිය දිනවල මාධ්‍ය වාර්තා කර තිබිණි.
RN
ශ්‍රී ලංකා නිදහස් පක්ෂය සිය දිස්ත්‍රික් සංවිධායකවරුන්ගේ සහ ආසන සංවිධායකවරුන්ගේ හදිසි රැස්වීමක් කැඳවා තිබේ.
ඒ අනුව, අද (10) පස්වරු 02.00 ට කොළඹ, ඩාලි පාරේ පිහිටි පක්ෂ මූලස්ථානය වෙත පැමිණෙන ලෙස සියලුම දිස්ත්‍රික් සහ ආසන සංවිධායකවරුන්ට දැනුම් දී ඇති බව සඳහන්.
පක්ෂ නායක මෛත්‍රීපාල සිරිසේන මහතා සිය බලතල වැඩි කරගනිමින් සිදු කළ පක්ෂ ව්‍යවස්ථා සංශෝධනයෙන් අනතුරුව දිස්ත්‍රික් සහ ආසන සංවිධායකවරුන් රැස් කෙරෙන පළමු අවස්ථාව මෙය වේ.
කෙසේවෙතත් මෙම රැස්වීම වර්ජනය කිරීමට ද ශ්‍රීලනිප සංවිධායකවරුන් පිරිසක් තීරණය කර ඇති බවත් ආරංචිමාර්ග සඳහන් කළේය.
RN
ශ්‍රී ලංකා නිදහස් පක්ෂයේ ලේකම්, පාර්ලිමේන්තු මන්ත්‍රී දයාසිරි ජයසේකර මහතාද විදුලිබල මණ්ඩලයට පොලු තැබූ මහජන නියෝජිතයන් අතර ඉදිරියෙන්ම සිටින බව වාර්තා වේ.
2016 වසරේ සිට මේ දක්වා දයාසිරි ජයසේකර මහතා පදිංචිව සිටින කොළඹ 12, ග්‍රෙගරි පාරේ අංක 12 දරන ස්ථානයේ පිහිටි නිවසේ විදුලි බිල මේ දක්වා පියවා නොමැත. ලංකා විදුලිබල මණ්ඩලයේ නියෝජ්‍ය සාමාන්‍යාධිකාරී (කොළඹ නගරය) හේමන්ත රණසිංහ මහතා විසින් මන්ත්‍රීවරයා වෙත යවා ඇති ලිපියක මේ බව සඳහන් වේ.
2016 ජනවාරි සිට 2022 අගෝස්තු දක්වා ගෙවිය යුතු මුදල රුපියල් 637,448.38 කි. නියෝජ්‍ය සාමාන්‍යාධිකාරීවරයා දැනුම් දෙන්නේ ඔක්තෝබර් 15 වැනිදාට පෙර මෙම මුදල් පියවීමට කටයුතු කරන ලෙසයි.
අදාල දිනයට පෙර මුදල් පියවීමට කටයුතු නොකළහොත් කිසිදු පූර්ව දැනුම්දීමකින් තොරව විදුලිය විසන්ධි කිරීමට කටයුතු කරන බව විදුලිබල මණ්ඩලය දැනුම් දෙනවා.
මෙම නිවස දයාසිරි ජයසේකර මහතාට ලබාදීමට පෙර පදිංචිව සිටි පුද්ගලයාද විදුලිබල මණ්ඩලයට බිල් ගෙවා නොමැති අතර එසේ නොගෙවූ මුදල රුපියල් 494,739.69 කි.
ඒ අනුව මහජන නියෝජිතයන් සඳහා ලබාදෙන එක් නිවසක පමණක් හිග මුදල රුපියල් මිලියනය ඉක්මවා තිබේ. පසුගිය දිනවලදී වාර්තා වූයේ හිටපු සහ සිටින මහජන නියෝජිතයන් 50 කට අධික ප්‍රමාණයක් භාවිතා කළ විදුලිය සඳහා බිල් ගෙවා නොමැති බවයි.
මසකට විදුලි ඒකක 40-50 ක් භාවිතා කරන සාමාන්‍ය ජනතාව මාස දෙක තුනක් බිල් නොගෙවා සිටියහොත් සැපයුම විසන්ධි කිරීමට උත්සුක වන විදුලිබල මණ්ඩලය මහජන නියෝජිතයන් මිලියන ගණනින් බිල් ගෙවීම පැහැර හරිද්දී වසර හය හත සැපයුම විසන්ධි නොකර දිගින් දිගටම විදුලිය ලබා දෙන්නේ මන්ද යන්න ගැටලුවකි.
UN
පොලිස්පති සී.ඩී. වික්‍රමරත්න මහතාගේ ක්‍රියාකලාපය සම්බන්ධයෙන්, ජනාධිපති රනිල් වික්‍රමසිංහ මහතාගේ ප්‍රධානත්වයෙන් පැවති ආණ්ඩු පක්ෂ මන්ත්‍රී කණ්ඩායම් රැස්වීමේදී කතාබහට ලක්ව තිබෙනවා. ආණ්ඩුව නියෝජනය කරන පොදුජන පෙරමුණු මන්ත්‍රීවරුන් රැසක්ම පොලිස්පතිවරයාගේ ක්‍රියාකලාපය විවේචනය කරමින් කරුණු දක්වා තිබෙනවා.
ආණ්ඩුවිරෝධී උද්ගෝෂනවලදී උද්ගෝෂකයන් පාලනය කිරීමට අසමත් වීම සම්බන්ධයෙන් දැඩිව චෝදනා කර ඇති පොහොට්ටු මන්ත්‍රීවරුන්, සී.ඩී. වික්‍රමරත්න මහතා පොලිස්පති තනතුරින් ඉවත් කරන්නැයි ජනාධිපතිවරයාට දැඩිලෙස බලපෑම් කර තිබෙනවා.
කෙසේ නමුත් ජනාධිපති රනිල් වික්‍රමසිංහ මහතා ඊට කිසිදු ප්‍රතිචාරයක් නොදක්වමින් සුපුරුදු නිහඬ ප්‍රතිපත්තිය අනුගමනය කර ඇති බවයි වාර්තා වන්නේ.
ආණ්ඩුවිරෝධී උද්ගෝෂණ පාලනය කිරීමේදී සිය වගකීම් ඉටු නොකළ පොලිස්පතිවරයා වහාම තනතුරින් ඉවත් කළයුතු බවත්, ඒ සඳහා හිටපු පොලිස්පති පූජිත් ජයසුන්දර මහතා ඉවත් කිරීමට භාවිතා කළ ක්‍රමවේදය අනුගමනය කළයුතු බවත් පොහොට්ටු මන්ත්‍රීවරුන් ප්‍රකාශ කර තිබෙනවා.
පාස්කු ප්‍රහාරය වළක්වා ගැනීමට අසමත් වීම සම්බන්ධයෙන් චෝදනා කරමින් පූජිත් ජයසුන්දර මහතා අනිවාර්ය නිවාඩු යැවීමට කටයුතු කළ අතර ඉන් අනතුරුව අදාල චෝදනා මත ජයසුන්දර මහතාට එරෙහිව නඩු පැවරීමට කටයුතු කළේය.
ජයසුන්දර මහතා අනිවාර්ය නිවාඩු යැවීමෙන් පසු වැඩබලන පොලිස්පතිවරයා ලෙස සී.ඩී. වික්‍රමරත්න මහතා පත්කළ අතර ඉන් අනතුරුව ඔහු ස්ථිරවම පොලිස්පතිවරයා ලෙස පත් කෙරිණි.
UN
නාමමාත්‍රිකව පිහිටුවා ඇති ජාතික සභාව පිළිගැනීමට ශ්‍රී ලංකා නිදහස් පක්ෂය සූදානම් නොමැති බවත්, එනිසා ජාතික සභාවට සහභාගිවීමෙන් වැළකී සිටින බවත් ශ්‍රී ලංකා නිදහස් පක්ෂය නිවේදනයක් නිකුත් කරමින් කියා සිටී.
නිදහසින් පසුව ශ්‍රී ලංකාව ඉතිහාසයේ දැවැන්තම අර්බුදයට මුහුණ දෙමින් සිටින බව පෙන්වා දෙන ශ්‍රීලනිපය පවසන්නේ කොවිඩ් වසංගතය තීව්‍ර වූ අවධියේදීම සර්ව පාක්ෂික වැඩපිළිවෙලක වැදගත්කම තම පක්ෂය විසින් අවධාරණය කළ බවයි. හිටපු ජනාධිපති ගෝඨාභය රාජපක්ෂ මහතා කැඳවූ සර්ව පාක්ෂික සමුළුවට සහභාගි වූ ශ්‍රීලනිපය ඉන්පසු වත්මන් ජනාධිපතිවරයා යටතේ සර්ව පාක්ෂික ආණ්ඩුවක් පිහිටුවීම සඳහා උපරිම උත්සාහ ගත් බවද සිහිපත් කරනවා.
සර්ව පාක්ෂික ආණ්ඩුවක් සඳහා පාර්ශ්ව කිහිපයකින් යෝජනා ඉදිරිපත් වූ අතර සර්ව පාක්ෂික ආණ්ඩුවක් සඳහා එකඟ වන පාර්ශව සහභාගි කරගනිමින් ජාතික විධායක සභාවක් පිහිටුවා ඒ හරහා අග්‍රාමාත්‍යවරයා ඇතුළු කැබිනට් මණ්ඩලය තෝරා ගැනීම කළයුතුව තිබූ බවද ශ්‍රීලනිපය අවධාරණය කරනවා.
කෙසේ නමුත් එම එකඟතා කඩකරමින් ජනාධිපති රනිල් වික්‍රමසිංහ මහතා අග්‍රාමාත්‍යවරයෙකු ඇතුළු කැබිනට් මණ්ඩලයක් පත්කර ගැනීමත් සමග සර්ව පාක්ෂික ආණ්ඩුව හා ජාතික සභාව පිළිබඳ වැඩපිළිවෙල කඩාකප්පල් වූ බව පෙන්වා දෙන ශ්‍රීලනිපය පවසන්නේ දැනට පිහිටුවා ඇති ජාතික සභාව කිසිදු බලයක් නොමැති, එසේම පිළිගත නොහැකි ව්‍යූහයක් බවයි.
මෙම තත්වය සැළකිල්ලට ගනිමින් ශ්‍රී ලංකා නිදහස් පක්ෂය ජාතික සභාව නියෝජනය කිරීමෙන් වැළකී සිටින බවත් කෙසේ නමුත් ජනතාවගේත් රටේත් යහපත වෙනුවෙන් ගන්නා සාධනීය ක්‍රියාමාර්ග සඳහා විපක්ෂයේ සිට සහාය ලබාදීමට කටයුතු කරන බවත් අදාල නිවේදනයේ සඳහන් වේ.
ජාතික සභාව සඳහා සහභාගිවීමෙන් වැළකී සිටින සෙසු සහෝදර දේශපාලන පක්ෂවලට ශ්‍රීලනිපයේ ආචාරය හිමිවන බවද එහි සඳහන් වේ.
UN
වත්මන් ආර්ථික අර්බුදයෙන්, දුප්පත් පොහොසත් භේදයකින් තොරව සියලු ශ්‍රී ලාංකිකයන් පීඩා විඳිමින් සිටින බව කෘෂිකර්ම අමාත්‍ය මහින්ද අමරවීර මහතා පවසනවා. වර්තමානයේදී කිසිවෙක් සැපපහසු ජීවිතයක් ගත කරනවා යැයි කිව නොහැකි බවද අමාත්‍යවරයා සඳහන් කරනවා.
මතුව ඇති තත්වයට වගකිව යුතු දේශපාලනඥයන් හෝ නිළධාරීන් සොයමින් සිටීම නොව සිදුකළ යුත්තේ සියලුදෙනා එකට එකතු වී අර්බුදයෙන් මිදීමට අවශ්‍ය පියවර ගැනීම බවද අමරවීර මහතා පෙන්වා දෙනවා.
මේ සියලු අර්බුද සමග ආණ්ඩුවේ ඇමතිවරයෙකු ලෙස ජනතාවට මුහුණදීමද අසීරු බවයි කෘෂිකර්ම ඇමතිවරයා පවසන්නේ. කෙසේ නමුත් මෙවැනි අර්බුදකාරී අවස්ථාවක විපක්ෂයේ සිටිමින් කෑගැසීම නොව තිබෙන කුමන හෝ ආණ්ඩුවකට එකතු වී දේශපාලනඥයෙකු ලෙස රට වෙනුවෙන් සේවය කිරීම වැදගත් බවද ඔහු සඳහන් කරයි.
මහින්ද අමරවීර මහතා මේ බව සඳහන් කළේ සූරියවැව ප්‍රදේශයේ ගැබිනි කාන්තාවන් සඳහා තම පෞද්ගලික වියදමින් වියළි ආහාර ලබාදීමේ වැඩසටහනකට එක්වෙමිනි.
සාමාන්‍ය ජනතාව පමණක් නොව දේශපාලනඥයන්ද ඉතා අසීරුවෙන් ජීවත් වන නමුත්, හැකි ආකාරයෙන් අසරණ ජනතාව වෙනුවෙන් මෙවැනි වැඩසටහන් ක්‍රියාත්මක කරන බවද අමරවීර මහතා ප්‍රකාශ කරනවා.
UN