Tag: ජාතික ජන බලවේගය

කොළඹ LNW: පරාජයට පත් වුණා නම් කොනිත්ත්න වැඩ නොකර ගෙදරට වෙලා සිටින ලෙස ජනාධිපති අනුර කුමාර දිසානායක මහතා හිටපු ජනාධිපතිවරයාට අවධාරණය කළේය.

ඒ, ඊයේ (24) පැවති ජාතික ජන බලවේගයේ පුත්තලම මහජන රැළිය අමතමිනි.

හිටපු පාලකයින් උත්සහ කරන්නේ විවිධ ප්‍රබන්ධ ගොඩනගමින් යළි බලය අත්පත්කර ගැනීමට වුවද ජාතික ජන බලවේගයේ ආණ්ඩුව වැට්ටවීමට නොහැකි බවයි ජනාධිපතිවරයා ප්‍රකාශ කළේ.

හැම අතින්ම දියුණු රටක් බවට ශ්‍රී ලංකාව පත්කරන බව හෙතෙම තවදුරටත් කියාසිටියේය.

”හිටපු ජනාධිපතිවරයා හදිසි මාධ්‍ය හමුවක් කැඳවල සල්ලි වෙන් කළාලු පඩි වැඩිකරන්න. එක්කෝ පඩි වැඩිකරන්න ඕනෙලු නැත්නම් ඒ සල්ලිවලට මොකද වුණේ කියල කියන්න ඕනෙලු. සාමාන්‍යයෙන් අපි දන්නවා ඕනෑම වැය ශීර්ෂයක දී, සෞඛ්‍ය සඳහා මුදල් වෙන් කිරීම සෞඛ්‍ය වැය ශීර්ෂය. අධ්‍යාපනය සඳහා මුදල් වැය කිරීම අධ්‍යාපන වැය ශිර්ෂය මෙහෙම තියෙනවා වැය ශීර්ෂයන්.ඒ මුදල් වෙන්කිරීම් සිද්ධ වෙන්නේ අයවැය ලේඛනයෙන්. එහෙම නැත්නම් පසුව ගෙන එන අතුරු සම්මත ගිණුම් හරහා. හැබැයි හිටපු ජනාධිපතිවරයා කියනවා ඔහු සල්ලි වෙන් කළාලු. කොතනකවත් එහෙම සල්ලි වෙන් කරලා නැහැ. තැපල් ජන්දේ තිබුණේ සැප්තැම්බර් 04,05.06. 03 වැනිදා කැබිනට් මණ්ඩලය තීන්දුවක් අරන් කිව්වා පඩි වැඩිකරනවා කියල. හැබැයි හිටපු ජනාධිපතිවරයා සල්ලි වෙන් කළේ නැති වුණාට වර්තමාන ආණ්ඩුව එළඹෙන මැතිවරණයේදී රාජ්‍ය සේවකයිනේ වැටුප් වැඩි කිරීම පිළිබඳව අවධානය යොමුකරලා තියෙන්නේ. දැන් පැරදුණා නම් ගෙදරට වෙලා ඉන්න. එක එක කොනිත්ත්න වැඩ ඒවා නොකර ඉන්න. එතුමල රට පාලනය කළා දීර්ඝ කාලයක්. දැන් පැත්තකට වෙලා ඉන්න. නමුත් අවශ්‍ය වෙලා තියෙන්නේ මොකක්ද? කුමන හෝ ප්‍රශ්නයක් හදාගෙන,කුමන හෝ ප්‍රබන්ධයක් හදාගෙන,කුමන හෝ අවලාදයක් හදාගෙන විවිධ ප්‍රයත්නයක් දරමින් තිබෙනවා යළි බලය අත්පත් කර ගන්න. ඒකෙ එක කතාවක් තමයි ඔවුන් කියමින් ඉන්නේ මාස තුනෙන් වැටෙයි.හයෙන් වැටෙයි. මතක තියා ගන්න ජාතික ජන බලවේගයේ ආණ්ඩුව වට්ටන්න ලැබෙන්නේ නැහැ.අපි මේ රට හදල තමයි නතර වෙන්නේ.හැම පැත්තෙන්ම හදනවා. ආර්ථික වශයෙන් දියුණු රටක්. පිරිසිදු භාවයෙන් දියුණු රටක්. මිනිස්සුන්ගේ හැසිරීම්වලින් දියුණු රටක්. නීතියේ විධානයෙන් ආධිපත්‍යයෙන් දියුණු රටක්. සිංහල,දෙමළ මිනිස්සු අතර ජාතික සමඟිය ආරක්ෂා කරන ලද රටක්. ජාතික ආරක්ෂාව තහවුරු කරන ලද රටක්. පරිසර පධතිය ගැන ආදරයෙන් ලෙන්ගතුව බලාගන්න රටක්. මේ හැම පැත්තෙන්ම දියුණු රටක් බවට ශ්‍රී ලංකාව පත්කරනවා. කාටහරි මේ වැඩේ බලාගෙන ඉන්න බැරි නම් අඩ අඩ කෙඳිරි ගගා ඉන්න. ඒක තමයි ඔය දකින්න තියෙන්නේ.” යනුවෙන් ජනාධිපතිවරයා වැඩිදුරටත් ප්‍රකාශ කරන ලදී.

ආශිකා බ්‍රාහ්මණ

කොළඹ LNW:පාස්කු ප්‍රහාරයට යුක්තිය ඉටුකරගැනීම වෙනුවෙන් මෙතෙක් කල් නිහඬව සිටිමින් එම විමර්ශනවලට බාධා කරමින් සිටි අය දැන් අමුතු කැක්කුමකින් කතා කරමින් සිටින අතර පාස්කු ප්‍රහාරය සම්බන්ධයෙන් අලුත් වීරයින් පිරිසක් බිහි වී සිටින බව අගරදගුරු අතිඋතුම් මැල්කම් කාදිනල් රංජිත් හිමිපාණන් වහන්සේ පවසති.

පාස්කු ඉරු දින ත්‍රස්ත ප්‍රහාරය සම්බන්ධයෙන් සත්‍ය හෙළි කිරීම සඳහා මේ රටේ නායකයා තමන්ට පොරොන්දුවක්දී ඇති අතර තමන් ඒ ගැන දෑස් විවෘත කරමින් බලා සිටිනා බවයි උන්වහන්සේ සඳහන් කරන්නේ.

පසුගිය රජය විසින් පත් කළ කමිටු දෙකේම වාර්තා රදගුරු මණ්ඩලයට ලබා දී ඇති බවත් පළවෙනි වාර්තාවේ ඇත්තේ ජනාධිපති කොමිෂන් වාර්තාවේ නිර්දේශම බවද අගරදගුරු හිමිපාණන් වහන්සේ කියසිටිති.

”පාර්ලිමේන්තුවේ ඉඳලා වචනයක් වත් කතා කරන්නේ නැතුව අපේ වැඩට බාධා කරමින් සිටි අය. දැන් අමුතු කැක්කුමකින් කතා කරන්න පටන් ගෙන තිබෙනවා. කෙමිෂන් සභාවල වාර්තා කෝ ඒවා කොහේද තියෙන්නේ කියා කියමින් වාර්තා කෝ කියමින් විමසනවා. පාස්කු දින ප්‍රහාරයේ අලුත්ම වීරයෝ පිරිසක් බිහි වී තිබෙනවා. ඒ අය වැඩක් නැහැ. පසුගිය රජය විසින් පත් කළ කමිටු දෙකක් තිබෙනවා. ඒ වාර්තා කතෝලික රදගුරු මණ්ඩලයට ලබා දුන්නා. පළවෙනි වාර්තාවේ තියෙන්නේ ජනාධිපති කොමිෂන් වාර්තාවේ නිර්දේශම යි. ජනාධිපති කොමිෂන් සභාවේ නිර්දේශම ලියන්න කොමිටියක් පත් කරන්න ඕනද? හැබැයි එතන තව පොඩි කට්ට වැඩක් කළා. ඒ නිර්දේශවලට අතරව දැන් රජය පැත්තේ වැඩ කරන උසස් නිලධාරීන් දෙන්නෙක්ට නීතිමය කටයුතු කරන්න කියලා කොමිටියෙන් යෝජනා කළා. ඒ කොමිටියට ඒ යෝජනා දුන්නේ කවුද, ආණ්ඩුවම යි.

ආණ්ඩුවට ඕන ඔන විදියට පාස්කු ප්‍රහාරයේ විමර්ශන මේ අතට ඒ අතට අර අතට යවන්න අපි සූදානම් නැහැ. ඒවා පිළිගන්න අපි සූදානම් නැහැ. අපිට ඕනේ මේකේ ඇත්ත කවුද?. ඇත්තටම මොකක්ද වුනේ කියා විමර්ශනය කිරීම පමණයි. මේ රටේ නායකයා අපිට පොරොන්දුවක් දීලා තිබෙනවා. ඒ ගැන විමර්ශන ආරම්භ කරයි. අපි ඇස් දෙක ඇරගෙන බලාගෙන ඉන්නේ අපේ නායකයා දුන් ඒ පොරොන්දුව ඉටු කරයි කියන විශ්වාසයෙන්” යනුවෙන් උන්වහන්සේ වැඩිදුරටත් පවසති.

ආශිකා බ්‍රාහ්මණ

කොළඹ LNW:ජනාධිපතිවරණ ජන්ද ප්‍රතිඵලයෙන් පසු ජනතා පරමාධිපත්‍ය ක්‍රියාත්මක වෙන ආකාරය පෙනෙන්නට තිබෙන බව ජාතික ජන බලවේගයේ ආර්ථික කමිටු සාමාජික සුනිල් හදුන්නෙත්ති මහතා පවසයි.

ජනතා ජන්දයේ බලයෙන් විශ්‍රාම නොයන දේශපාලකයින් දැන් විශ්‍රාම යන බවත් අසන්නට ලැබෙන බවයි හදුන්නෙත්ති මහතා පවසන්නේ.

දැන් රට පාලනය අක්රණේ ජනතාව යන්න ජනතාවට දැනෙන්නට පටන් ගෙන තිබෙන බවද ඔහු කියාසිටියි.

”රනිල් හරි සජිත් හරි ආවා නම් විශ්‍රාම යනවා කියපු අය විශ්‍රාම යනවද? නැහැ. ඒගොල්ලෝ විශ්‍රාම යැව්වේ කාගේ ජන්දෙන්ද අපේ ජන්දෙන්. ජනතාව ජන්දේ දුන්නා මාලිමාවට. වැදුණා. මහ මැතිවරණයටත් වෙන්නේ ඕක. ඒගොල්ලෝ විශ්‍රාම යන්න තීරණය කරන්නේ අන්න ඒ නිසා. ලංකාවේ දේශපාලනයේ පළමු වතාවට දේශපාලකයෝ විශ්‍රාම යනවා කියලත් අපිට අහන්න ලැබුණා. මෙච්චර කාලයක් විශ්‍රාම ගියේ රජයේ සේවකයොනේ. දේශපාලකයෝ එක්කෝ මැරෙනකම් ඉන්නවා නැත්නම ගහල පන්න්නකම් ඉන්නවා. විශ්‍රාම ගිය අයත් සුළු පටු අය නෙවෙයි. පරම්පරාවම රට පාලනය කරනවා කියල හිතාගෙන හිටපු අය. ඒගොල්ලෝ පෙන්ෂන් යැව්වේ ජනතාවගේ ජන්දෙන්. ඒකට කියන්නේ ජනතාවගේ බලය, පරමාධිපත්‍ය බලය. රට පාලනය කරන්නේ ජනතාව කියල දැන් ජනතාවට දැනෙන්න පටන් අරන් තියෙනවා. අනුර දිසානායක සහෝදරයා දිවුරුම් දෙන්න විනාඩි 20යි, වියදම සොච්චමයි. ඉතුරු කරපු ගැන මිලියන් 200ක් විතර කියනවා. රනිල් වික්‍රමසිංහ හරි සජිත් ප්‍රේමදාස හරි ජනාධිපති වුණා නම් කෝටි ගාණක් වියදම් කරනවා. ඒක නැවැත්තුවේ කවුද? ජනතාව. අනුර සහෝදරයා ජනාධිපති වුණාට පස්සේ ප්‍රභූ ආරක්ෂාවත් වාර්තා කැඳවල අත්‍යවශ්‍ය අයට පමණයි. කෝටි ගාණක් ඉතුරු වෙනවා. එහෙම ඉතුරු කළේ කවුද? මහජනතාව. එහෙම තමයි මහජනතාවගේ ජන්ද වැඩකරන හැටි. අපි දන්නවා මීට අවුරුදු දෙකකට කලින් අපේ රට අවමානයට ලක් වුණු රටක්. රට බංකොලොත් වෙලා රටේ නායකයෝ හොරකම් කරනවා. රටේ සල්ලි පිටරටවල හංගනවා. රටට තෙල් ටික ගන්නවත් සල්ලි නැහැ. රුපියල කඩාගෙන වැටෙනවා. ගිය මාසෙට කලින් තරුණ තරුණියෝ පෝළිමේ හිටිය රට යන්න. දැන ජනාධිපතිවරණයෙන් පස්සේ කවුරු හරි කියනවා ඇහුනද මේ කාලකන්නි රටේ ඉදල වැඩක් නැහැ මම යනවා කියල. ඒ වෙනුවට අපට අහන්න තියෙන්නේ පිටරට ඉන්න අය ලෑස්තියි අපේ රටට සල්ලි එවන්න. රට දාලා යන එක වෙනුවට පිටරට ඉන්න මිනිස්සු ලංකාවට එන්න ලෑස්තියි. ඒ වෙනස ඇති කළේ කවු? මහජනතාව.” යනුවෙන් හදුන්නෙත්ති මහතා තවදුරටත් සඳහන් කරයි.

ආශිකා බ්‍රාහ්මණ

කොළඹ LNW:අමාත්‍යාංශවල වියදම් පියවා ගැනීම සහ කල්පිරුණු භාණ්ඩාගාර බිල්පත් හා භාණ්ඩාගාර බැඳුම්කර ආපසු ගෙවීම සඳහා දේශීය මූල්‍ය වෙළෙඳපොළෙන් අරමුදල් රැස් කර ගැනීමක් මිස වෙනත් දෙයක් මේ දිනවල සිදු නොකරන බව ජනාධිපති ආර්ථික හා මූල්‍ය කටයුතු පිළිබඳ ජ්‍යෙෂ්ඨ උපදේශක මහාචාර්ය අනිල් ජයන්ත මහතා පවසයි.

ආණ්ඩුවකට එදිනෙදා අත්‍යවශ්‍ය වියදම් පියවා ගැනීමට,එම සේවා ඉදිරියට පවත්වාගෙන යෑමට අරමුදල් අවශ්‍ය වන අතර සෑම සතියකම භාණ්ඩාගාර බිල්පත් හා භාණ්ඩාගාර බැඳුම්කර අලෙවි කිරීම මඟින් මහ බැංකුව අරමුදල් රැස් කර ගැනීම සිදුකරන බව මහාචාර්යවරයා කියාසිටියි.

”ඒ වගේම නියමිත දිනට කල්පිරෙන ඒවාට ආපසු ගෙවීම් සිදු කරනවා. මේ සාමාන්‍ය ක්‍රියාවලියක්. එම ක්‍රියාවලිය මේ දිනවලත් සිදුවනවා. නව ජනාධිපතිවරයා පත්වූවා යැයි කියා විශේෂයක් නැහැ. අලුතින් ණය ගැනීම් සිදුකිරීමක් සිදු කර නැහැ. සාමාන්‍ය පරිදි අරමුදල් රැස් කිරීමක් පමණයි සිදු කරන්නේ. ඒ හැරෙන්නට දේශීය මූල්‍ය වෙළෙඳපොළෙන් විශේෂ, අමුතු වැඩකට හෝ අසාමාන්‍ය ආකාරයකට හෝ අරමුදල් රැස් කිරීමක් සිදු කර නැහැ. මාධ්‍ය මඟින් පෙන්වා දෙන ආකාරයට දේශීය හෝ විදේශීය මූල්‍ය වෙළෙඳපොළෙන් අප ණය ලබාගෙන ඇත්දැයි සොයා බැලීමක් කළ යුතුයි. මූල්‍ය වෙළෙඳපොළ ස්ථායීකරණය කිරීම ශ්‍රී ලංකා මහ බැංකුවේ වගකීම. ඒ සඳහා ඔවුන් පසුගියදා එක්සත් ජනපද ඩොලර් මිල දී ගැනීමක් සිදු කර තිබෙනවා. එය නව ජනාධිපතිවරයා පත්වීමට පෙර කළ දෙයක්. අපි ඒ සම්බන්ධයෙනුත් සොයා බැලීමක් කළ යුතුයි.දේශීය වෙළෙඳපොළෙන් අරමුදල් රැස්කර ගැනීම සම්බන්ධයෙන් කොපමණ මුදලක් රැස් කර තිබේ ද? යන්න පිළිබඳ සොයා බැලීමට කටයුතු කරනවා” යනුවෙන් අනිල් ජයන්ත මහතා ප්‍රකාශ කරයි.

ආශිකා බ්‍රාහ්මණ